ភ្នំពេញ៖ ក្រសួងយុត្តិធម៌ បានបញ្ជាក់ថាក្រសួងកំពុងសហការជាមួយក្រសួងការបរទេសនិងសហប្រតិបត្តិការអន្តរជាតិ ពិភាក្សាអំពីបែបបទ និងនីតិវិធីសម្រាប់ការស្នើសុំព្រឹត្តិបត្រថ្កោលទោសតាមរយៈស្ថានតំណាងកម្ពុជានៅតាមបណ្តាប្រទេសនានា។

ក្រសួងយុត្តិធម៌បានប្រាប់ឱ្យដឹងថា ក្រសួងនឹងចេញផ្សាយសេចក្តីជូនដំណឹងអំពីបែបបទ និងនីតិវិធីនៃការស្នើសុំព្រឹត្តិបត្រថ្កោលទោសសម្រាប់ ប្រជាពលរដ្ឋខ្មែរនៅក្រៅប្រទេសនាពេលខាងមុខនេះ។

ជាមួយគ្នានេះក្រសួងយុត្តិធម៌ នឹងជូនដំណឹងអំពីពេលវេលាជាក់លាក់នៃការដាក់ឱ្យដំណើរការសេវាព្រឹត្តិបត្រថ្កោលទោសឌីជីថល ក្នុងជំហានទី២ នាពេលឆាប់ៗខាងមុខនេះ ខណៈកាលពីខែកុម្ភៈ ឆ្នាំ២០២៣ ក្រសួងបានដាក់ឱ្យដំណើរការ សេវាព្រឹត្តិបត្រថ្កោលទោសតាមប្រព័ន្ធឌីជីថល ជំហានទី១ ដើម្បីផ្តល់នូវសេវាឆាប់រហ័ស និងភាពងាយស្រួលជូនដល់សាធារណជន ដែលមានតម្រូវការស្នើសុំព្រឹត្តិបត្រថ្កោលទោស។

ការអភិវឌ្ឃសេវាព្រឹត្តិបត្រថ្កោលទោសឌីជីថល មានគោលបំណងដើម្បីផ្តល់នូវភាពឆាប់រហ័ស និងភាពងាយស្រួលជូនដល់សាធារណជនបន្ថែមទៀត ក្នុងគោលដៅកាត់បន្ថយការ ចំណាយលើពេលវេលា និងថវិកា ជូនសាធារណជនក្នុងការស្នើសុំព្រឹត្តិបត្រថ្កោលទោស ស្របតាមយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលកម្ពុជា នីតិកាលទី៧នៃរដ្ឋសភា។

នាយករដ្ឋមន្ត្រីកម្ពុជា សម្តេចធិបតី ហ៊ុន ម៉ាណែត បានគូសបញ្ជាក់នៅវេទិកាសំណេះសំណាលជាមួយកម្មករនិយោជិតនៅខេត្តកំពង់ស្ពឺកាលពីថ្ងៃសៅរ៍ទី០៩ ខែកញ្ញា ថា សម្តេចបានពិភាក្សាជាមួយរដ្ឋមន្ត្រីក្រសួងយុត្តិធម៌ លោក កើត រិទ្ធិ អំពីការអនុវត្តគោលការណ៍បំពេញបែបបទស្នើសុំលិខិតថ្កោលទោសតាមអនឡាញដើម្បីកាត់បន្ថយការចំណាយ និងពេលវេលាឡើងចុះសម្រាប់បំពេញបែបបទផ្ទាល់។

សម្តេចធិបតី ថ្លែងដូច្នេះថា៖ «យើងត្រូវគិតឡើងវិញ អំពីបង្កភាពងាយស្រួល កាត់បន្ថយតម្លៃ ជូនពលកររបស់យើង ក៏ដូចជាអ្នកដែលត្រូវការលិខិតថ្កោលទោស ពីព្រោះលិខិតថ្កោលទោសមិនមែនតែពលករត្រូវការនោះទេ អ្នកផ្សេងៗទៀតក៏ត្រូវការដែរ»៕